周家蔚2012年嫁咗畀洪天明之後誕下兩子大仁同竟琋,眨吓睇兩個都已經分別7歲同5歲喇!尋日周家蔚上戴咗幾張相,兩個小朋友趁住一年一度嘅母親節向媽媽表孝心,不過認真啲睇,相中嘅主角竟然唔係周家蔚,而係一位長腿女子,究竟係咩人嚟呢?
(周家蔚IG)
洪天明上載咗一條短片,片段中兩個囝囝拎住自己親手畫嘅母親節卡歡天喜地咁衝落樓梯,不過當「媽媽」擰轉面嘅時候,竟然係男扮女裝嘅天明。本身咁靚女嘅媽媽變到咁驚嚇,兩個都走夾唔抖,天明就拋出一句:「我只想感受到,媽媽的偉大呀。」天明仲曬出佢嘅光管腳長腿,霎眼睇,成個Top model咁呀。
喂呀~好似睇完有啲不安。(洪天明IG)
有網民話天明呢個樣似陳柏宇太太,大家覺得呢?(周家蔚IG)
都咪話唔嚇親~(洪天明IG)
天明整色整水都係為博天下母親一笑,原來天明呢個妝同假髮造型都係出自真·媽媽周家蔚。唔少圈中嘅朋友見到都好大反應,唐詩詠仲話第一眼以為係家蔚,林子善就留言話下次如果見到佢係呢個造型出現要打佢兩巴!周家蔚自己都留言:「You think you can replace me? Never!!!」(你以為可以取代我?永遠都唔可能!)
見到咁大隻手掌即刻露餡。(洪天明IG)
雖然天明反串造型好爆,不過唔少網民都將focus放咗喺佢一對愈大愈靚仔嘅寶貝仔身上。近期受疫情影響,一對小朋友都停課,反而令佢哋多咗時間喺屋企,天明不時都會拍片分享,兩個囝囝表演欲都好強,盡得佢演藝世家嘅真傳呀!
呢個畫面順眼好多!(周家蔚IG)
眨吓眼咁大個。(洪天明IG)
弟弟都有少少怕怕醜醜。(洪天明IG)
哥哥似乎天生食呢行飯!(洪天明IG)
(洪天明IG)
細仔都仲會錫錫爸爸表愛意,天明問小朋友係咪去到12歲就唔會再錫爸爸,似乎好唔捨得佢哋長大!(洪天明IG)
撰文:黃蘊姿